Garðskagi er einstök náttúruperla þar sem hægt er að njóta útsýnis, sækja sér orku frá ólgandi brimi eða gæða sér á rjúkandi kaffi og meðlæti. Á svæðinu er góð aðstaða fyrir tjaldbúa, tjaldvagna og húsbíla. Snyrting, rennandi vatn og rafmagn er til staðar. Við Garðskaga má horfa á sólsetrið við Snæfellsjökul og sjá sólina gylla allan Snæfellsnesfjallgarðinn, Akrafjallið, Esjuna og Reykjanesfjallgarðinn.



Norðurljós er ljósfyrirbæri í efstu lögum gufuhvolfsins, mynduð af rafhlöðnum ögnum frá sólinni sem gera þunnt loftið lýsandi. Agnirnar sveigjast vegna segulsviðs jarðar og beinast í átt til hennar í belti sem liggur frá norðursegulskauti m.a. yfir Garðskaga. Á veturna sjást norðurljósin hvergi betur en á Garðskaga. 






Gamli vitinn á Garðskaga var reistur á Garðskagatá 1897 en áður hafði verið þar leiðarmerki eða varða frá árinu 1847 og síðar með ljóskeri frá 1884. Gamli vitinn var notaður sem fuglaathugunarstöð á vegum Náttúrufræðistofnunar Íslands 1962-1978.  Fjölmargir leggja leið sína að Garðskaga til þess að njóta útsýnisins sem oft er stórfenglegt og hefur gamli vitinn veitt innblástur og verið í aðalhlutverki í listsköpun, t.d. í myndlist og ljósmyndun.



Nýi vitinn var byggður 1944 og er hann eitt af helstu  kennimerkjum Garðs í dag. Vitinn stendur á Garðskagatúni og er hann opinn almenningi. Útsýni frá svölum vitans er stórfenglegt og sést þaðan vítt og breitt til allra átta.  Vitavarðahúsið og vitarnir tveir spila einnig stórt hlutverk í dagskrá Sólseturshátíðarinnar en settar hafa verið upp myndlistarsýningar í Vitavarðahúsinu og m.a. flutt tónlistaratriði í nýja vitanum.



Fjaran á Garðskaga er vinsæll útivistarstaður og einn ævintýraheimur fyrir börnin.  Garðskagi er rómaður fyrir fjölbreytt fuglalíf árið um kring en lega skagans og fjölbreytt búsvæði gera hann að einum besta fuglaskoðunarstað landsins.  Þar má sjá eina mestu flóru farfugla á landinu frá vori og fram á haustið. Þeir sem ekki þekkja fuglana geta kynnt sér þá á veglegum skiltum sem sett hafa verið upp við bílastæði gamla vitans eða á heimasíðunni áður en lagt er af stað. 

.

 Garðssjór er vinsæll til hvalaskoðunar og landselir sitja tíðum uppi á Skagaflös eða Lambarifi. Útselir sjást stundum, oftast á sundi. Höfrungategundin hnýðingur er algengastur og er oft mikið fjör í dýrunum. Hrefnur sjást reglulega og hnúfubakar eru alltíðir yfir sumartímann, sérstaklega í júlí.  Önnur spendýr sem búast má við að sjá eru minkur og hagamýs.

Veitinga- og kaffihúsið Flösin er til húsa í Byggðasafninu á Garðskaga.  Í húsinu er aðstaða fyrir ýmsar uppákomur og listsýningar og hafa fjölmargir listamenn og handverksfólk sýnt verk sín á safninu. Þá er veitingasalurinn kjörinn fyrir veislur og fundahöld.  Sett hefur verið upp mynd með örnefnum á svölum hússins en þar er hægt að horfa á fallegt sólarlagið gylla sjóndeildarhringinn. Öflugur sjónauki er á svölunum  þar sem skoða má sjófugla að veiðum og sjá hvalina stökkva.

Úr bókinni Undir Garðskagavita eftir Gunnar M. Magnúss:

Á tánni, hér yst á skaganum, þar sem aldan svarrar á þrjá vegu, frá suðri, vestri og norðri, - þar sem hafveðrin svífa að, voldug og þung, - þar sem stormar og steypiregn leika sér öld fram af öld að tæta hvert moldar- og gróðurkorn af hinni staðföstu klöpp, - þar sem vítt sér um flóann og suður og út á Atlantshaf og sjófuglinn leikur sér allt um kring, - hér í landnámi Ingólfs til suðvesturs stendur vitinn á klöppinni og sendir geisla sína og leiðarljós til sæfarenda, ýmist í tærri heiðríkjunni eða út í nætursortann og hríðina.